Stappenplan bij de opzet van een eigen klein bedrijf.
Fundashon Empresa Chikí Kòrsou en Korpodeko, 1988.
Fragment
Un plan bon pensá ta yuda un empresario den tur fase di su proyekto. Pa e fase di orientashon por ehèmpel, ta bon pa deliñá presis kiko ta su meta. Si pone e puntonan aki riba papel, esei lo yuda e empresario sigui su liña di pensamentu original.
Por ehèmpel: Ki tipo di negoshi mi ke lanta? Mi konosé e produkto bon? Mi tin poko sèn hespar pa mi kontribuí na e kapital inisial? Ta sufisiente si mi por biba di dje òf mi ta ambishoná kresementu? Ta e intenshon pa tuma hende den servisio òf t’ami ta bai hasi tur trabou mi so? Ki kalidat mi ke ofresé mi klientenan? Ki tipo di kliente mi tin na bista? Mi so ta bira doño di e negoshi òf mi ta buska un òf mas sosio?
Esakinan ta djis algun punto ku ta yuda determiná nos meta. Ademas di yuda den desishonnan importante, un aserkamentu asina ta útil pa mira unda falta konseho òf informashon. […]
Hopi hende tin e deseo di lanta un negoshi propio, pero nan no ke pensa riba e parti atministrativo. Den nan bista atministrashon ta kos di bon bida pa hende ku gusta hasi difísil. I nan ta preferá warda tur papel den lachi te dia lachi no por sera mas. Pero sin ningun eksepshon, tur lo ripará un dia ku kos a sali for di man. Ta nesesario pa komprendé pakiko kada negoshi mester di un bon atministrashon.
E balor mas grandi di un atministrashon korekto ta ku e ta ofresé informashon balioso ku kada empresario mester pa e por tuma sierto desishon. For di su atministrashon e ta mira por ehèmpel kon ta pará ku su likides; e ta mira den ki temporada di aña su gastunan ta mas haltu; e por husga mihó si ta oportuno pa hasi invershon nobo; ku yudansa di su atministrashon e ta kontrolá su reservanan, i asina nos por sigui bai.
Atministrashon na tempu i korekto ta skapa e empresario hopi doló di kabes. Imaginá bo kuantu problema bo ta haña bo aden si merkansia bini robes anto bo no por haña e pedido ni resibu. Anto kuantu tempu bo no ta pèrdè si ora di yena papel di belasting bo no tin nada registrá?
Papiando di belasting, ta bon pa kita sierto malkomprendimentu for di mundu. Tin hende ta pensa ku mas kos nan skirbi den bukinan, mas tantu plaka nan mester paga belasting. E idea aki ta eroneo. Sea ku un empresario hiba un bon òf mal atministrashon, e mester paga belasting tòg. Esun ku tin un bon atministrashon tin dos bentaha. El a registrá tur gastu ku – segun lei – por dedusí for di entradanan pa baha e pesu di belasting. I si na su konsepto e suma di belasting a sali haltu, e tin informashon konkreto pa papia ariba ku Inspekshon di Belasting.