Banderita

Di tur loke mi a yega di skirbi i publiká, e agènda di Banderita ta esun ku mi gusta ménos. Riba su mes, e idea tabata bon. Ku e agènda akí m’a mara mi inkietut sosial di nos tempu, na un kustumber bieu. Banderita ta di fin di siglo 19 te promé parti di siglo 20. E ta un teksto di 2 pa 4 regel skirbí riba un pida papel di koló den forma di un bandera chikitu, mará na un palitu. E teksto ta referí na kualke suseso ku a hala atenshon e aña ei, hopi biaha ku un toke di ironia òf sarkasmo ku ta invitá hende pensa.

Pero e banderitanan den e agenda akí no por para banda di esnan di ántes. Esei a siña mi ku teksto pa radio, no semper ta hasi impakto den forma skirbí. Mi banderitanan tabata skirbí pa radio. E gran akohida ku nan a haña na radio, ta danki entre otro na e forma insuperabel ku Mila Palm i Kenneth Vinck a presentá nan. Sinku aña despues nan a sali den forma di agenda. Mi ta hopi gradesidu na dos gigante di literatura Kurasoleño: Lucille Berry-Haseth, ku a skirbi un presioso introdukshon, i Elis Juliana, ku a ilustrá kada banderita na su estilo inigualabel. Mi kariño i rèspèt pa nan ta grandi.