Ku wowo hinchá di yora i kurason pisá di tantu fèrdrit, Stefanie a pone su kabes riba skouru di su kasá. Misa tabata kargá ku famia, amigu i konosí ku a bin despedí di Milandra. Stefanie ta rel kada biaha ku pastor bisa e palabra ‘defuntu’ durante respòns. Pa Stefanie, su amiga Milandra ta sinónimo di bida, alegria, kurashi. Miéntras Pastor ta papia, Stefanie a sera wowo pa trata di rebibá momentunan presioso di nan amistat.
E ta kòrda kon e promé dia na lushiskol, yùfrou a mustr’é un mesa te patras den klas. Yùfrou di: “E mucha ei yama Milandra. Bai sinta banda di dje.” Stefanie a brasa su mama bisa ayó, kana bai patras i hala un stul sinta banda di e mucha ku a bira su amiga pa bida largu. Atrobe su hemut ta yena ora e kòrda kon dushi nan a krese huntu, hunga, pasa prèt, hasi kos di malamucha, siña huntu, papia na telefon i konta otro sekretu miéntras añanan ta pasa i mundu ta kambia rònt di nan. Pero e kambio mas grandi a gatia drenta nan amistat ketu ketu, sin ku nan a duna nan kuenta.
Un atardi, lorando bolo pretu pa risibimentu di Milandra su yu, Milandra di: “Kasi sigur bo no ta gusta stail di mi mesa di bolo. Pero m’a skohe mi adorno i kolónan manera nos yu’i Kòrsounan gusta.” Stefanie a sigui mara streki sin hisa kara. Despues di basta ratu, ora el a dominá su emoshon, e di: “Bo ke men ku ami no ta yu di Kòrsou?” Milandra a pura kontestá: “No komprendémi robes. Mi sa ku boso ta papia papiamentu na kas i balia nos muzik. Pero ora mi bisa yu di Kòrsou mi ke men … ehh … hende manera mi.” Stefanie a keda ketu atrobe. Milandra, den tur sinseridat, no a komprendé kiko ta e problema. E di: “Ai laga ‘i nèk Stefanie. Nos ta hopi bon ku otro. Mi stimabo manera mi mes ruman. Pero bo no ke bisami ku bo ta mes yu di Kòrsou ku mi, tòg?” “Pakiko nò?” Stefanie a insistí. Mi avochinan i bo avochinan tin mes tantu tempu na e isla akí. Pakiko nos un ta mas yu di Kòrsou ku e otro?”
Milandra a pèrdè pasenshi. E di: “Awor sí bo ta kompará pampuna ku zet’i brek. Pakiko bo no ta lanta wak den spil? Kisas e ora ei bo ta kòrda ku ta di Europa bo hendenan a bini.” “Anto kiko?”, Stefanie a kontestá. “Tur hende ku ta biba akí a bini di otro kontinente. E úniko grupo original, e indjannan, kasi no t’ei mas.”
E sonido solèm di klòk di misa a ranka Stefanie for di su reflekshon. Rònt di dje tur hende a lanta para pa hiba e defuntu su último lugá di sosiegu. Kanando den e korteho pa bai santana, di ripiente el a komprendé pakiko nèt e kombersashon ei ku Milandra, a bini ariba awor. Ta pasobra e dia ei nan amistat a hecha, yega su momentu kumbre. Dos hende a habri kurason ku otro, papia te den mardugá, skucha otro, yora huntu, splika tur loke tin di splika, i buta tur sobrá un banda.