Ta parse ku na hopi pais tempu a bòltu pa sindikalismo. Aki tambe hende a kuminsá mira ku viktoria sindikal por sali trahadónan karu a lo largu.
Durante e último 15 añanan aki sindikalistanan na Kòrsou tabata sigur ku kada biaha ku nan sinta negoshá, nan ta saka sikiera algu pa nan trahadónan. Si no ta oumento real di salario, ta kualke adelanto den e pakete di kondishon sekundario. Asta si negosiashonnan bira difísil, opinion públiko òf gobièrnu tabata pone preshon direktamente òf indirektamente riba dunadó di trabou pa evitá intrankilidat sosial. Prinsipalmente kaminda ta trata kompanianan grandi manera Shell, Dok i hotèlnan di Kòrsou.
Pero awor ta parse ku bientu a bòltu. Tuma por ehèmpel e situashon na Shell. Si algun aña pasa nos tabata negoshá pa oumento di salario, awe nos ta papia di hasi sakrifisio pa tene e kompania na Kòrsou. Mas òf ménos meskos ta sosodiendo den gobièrnu, den turismo i diferente otro sektor.
Na otro parti di mundu tambe, sindikatonan a haña nan fòrsa di rekonsiderá nan polítika, maske ta temporalmente. Sindikatonan na Fransia, Italia, Inglatera, Bèlgika, Dinamarka i Alemania Oksidental ta mirando ku duele kon nan kantidat di miembro ta bahando despues ku hopi fábrika i mina a sera porta pa semper. Meskos ku aki na Kòrsou, na Oropa tambe sindikatonan ta bringa pa mantené trabou en bes di subi entradanan. Pasobra ei tambe ekonomia a krese mashá poko, desempleo a krese mashá hopi, i a bini kambionan industrial drástiko ku ta eksihí adaptashon.
No solamente den paisnan derechista, pero tambe den paisnan iskierdista e situashon ta difísil pa sindikatonan. Dia e sosialista François Mitterand a bira presidente di Fransia na 1981, sindikatonan a kanta gloria. Porfin nan tin un aliado komo presidente di pais. En berdat, den su promé aña na poder Mitterand a subi suèldu mínimo ku 20%. Pero problemanan ekonómiko i e posishon suak di su moneda a fòrsa Mitterand kòrta gastunan di gobièrnu drástikamente i kita 60.000 hende fo’i trabou den mina i industrianan di Fransia. Esaki a dal e sindikatonan hopi duru, pasobra retiro ke men ménos miembro, i ménos miembro ke men ménos poder.
Na Italia e lider sindikal Benvenuto a bisa ku si sindikatonan no modernisá nan polítika, poko poko nan ta pèrdè nan poder. E lider sindikal di Bèlgika, Robert d’Hondt, a bisa ku e problema mas grandi di sindikalistanan ta pa konvensé nan miembronan ku mester bini kambio. E tempu a pasa ku sindikalista por pone preshon pa loko sin mira mas aleu. Preshon sin pensa mas aleu ta duna resultado ku ta dal bèk hopi duru. P’esei e ke pa sindikatonan siña pone tur kos den balansa. Bringa pa bo miembronan. No a kosto di bo miembronan.
No por invitá d’Hondt pasa algun dia akibanda?