Promé ku 12 or bati ya Djomarison ta wak for di bentana pa mira Linetty su mama yega. Linetty su mama yama Lèni. Tanchi Lèni semper ta un di e promé mamanan ku ta bin buska su yu for di skol. Tur mayor mester buska nan yu te den klas pasobra e muchanan ta chikitu ainda. Djomarison sí ta mas grandi kaba. Pero komo e no ta papia bon ainda, yùfrou a bisa ku ta mihó e keda den e grupo akí un poko mas.
Ata tanchi Lèni a yega. Djomarison a mir’é baha for di outo, kana drenta skol purá purá. E ta spera ku awe tambe tanchi Lèni ta bin buska Linetty te na mesa den klas. Pasobra Linetty ta sinta banda di dje i tin ora tanchi Lèni ta pasa man den Djomarison su kabei, puntr’é kon a bai awé na skol.
Pero awe Linetty a kore topa su mama den porta. Djomarison a mira kon Linetty a laga su tas kai abou, kaba bula den brasa di su mama. Tanchi Lèni a karisi’é nèt un ratiku promé ku el a bah’é na suela bèk. Tur mucha a yama nan ayó. E muchanan gusta tanchi Lèni, pasobra e ta kòrda nòmber di nan tur.
Djomarison tin gana pa e muchanan gusta su mama tambe. I e tin mas gana ainda pa su mama gusta e. Atá… nèt su mama a bin busk’é. Djomarison a haña un bon idea. ‘Mi ta spera tur mucha mira’, el a pensa. I asina su mama a krusa drèmpi drenta klas, el a saka un kareda bula riba dje meskos ku el a mira Linetty hasi.
“Au, ai ai aaaaiii.” Djomarison a grita di doló ora su mama a stot e ku rudia den su stoma, bent’é te bou di yùfrou su lèsenar. “Mir’akí, mucha di mala dònder,” e mama a grita. “Bai hunga makaku di mondi na kas di bo tata. Sóbadje ta su falta ku b’a sali bestia asina.” Djomarison a gatia sali fo’i bou di lèsenar miéntras e muchanan ta bòltu di harimentu. Di bèrgwensa e ker a skonde tras di lomba di yùfrou. Pero su mama a rank’é na su orea, but’é piki su tas for di abou, kaba push’é duru p’e bai kai den kurá di skol. “Mi no sa kiko m’a hasi pa m’a hañami ku un yu asina, yùfrou sa,” e mama a bisa. Djei el a ranka e yu na su brasa, lastr’é bai outo kuné, lagando yùfrou ku awa na wowo.
Na kaminda pa kas e mama a sigui heringá. El a zundra ku papia te bira hers. Pero Djomarison a stòp di tende. E ta fiha duru riba un punto hundu ayá, kaminda niun hende no por yega.