Gibi su kas

For di mucha Gibi a soña ku su mes kas. Ku tas di skol riba lomba e tabata sali bai skol na tempu p’e por slènter tira bista den e kasnan kant’i kaminda. Gibi no tabatin mal intenshon. Al kontrario. Na kada kas e tabata purba imaginá su mes kuantu hende ta biba aden, si e muchanan tin kamber pa drumi i si nan tin un lugá pa sinta lesa òf siña trankil.

E mes no tabata sa nunka unda e ke bira pa haña un tiki trankilidat na kas. Hopi biaha e tabata drumi den stupi patras, pasobra kas tabata yen di ruman, yu di ruman, mama ku su amigu, yu di mama su amigu, i otronan ku tabata keda mas o ménos temporalmente. Anochi e tabata buska klaridat di lus di kaya pa kaba di hasi su lès.

Su rumannan tabata tent’é sin fin. Porfirio, e amigu di su mama, a puntr’é ki idea haltu e tin den su kabes. Asta su mama a bis’é pa stop di hasi interesante. Pero Gibi a sigui lucha. Despues di skol e tabata yena rèki na supermerkado, i fin di siman e tabata lanta for di 5 or di mardugá pa traha den un panaderia pegá ku kas.

Tur esei ta hopi aña pasá. Awe Gibi tin su mes pida kas. Esta kontentu e tabata dia ku el a kue su bònder di paña bai biba den e parti ku ta kla. Pero su alegria no a dura hopi. Apénas el a kaba di pone dak riba sala ku kushina, ata su rumannan Gwéndoly, Shairon i Estreya a bati na su porta, kada un ku saku di paña i potoshi. Sin puntra si por òf nò, nan a anunsiá ku nan a bini pa keda, pasobra nan no por soportá niun dia mas den kas di nan mama. Gibi a protestá. E di: “Tur e añanan ku m’a bringa pa para riba mi mes pia, boso a hari mi. Ku ki derecho boso ta reis riba mi awor ku mi tin mi kas?”

A surgi un pleitu masha mahos. E rumannan a akus’é di ta hopi egoista. Nan a grita: “Bo no tin bèrgwensa di manda nos bèk den e fièrnu ku bo mes a hui? Abo sí tin no un, sino dos kamber di drumi pa bo so, ku asina un sala blo bashí.” E pleitu a bira bòmbòshi te finalmente Gibi a sukumbí. Entre tantu 7 aña a pasa. Gwèndoly, Shairon i Estreya ta biba serka dje ainda. Estreya a haña dos yu i el a eksihí un kamber p’e ku e muchanan. Den e otro kamber nan mama sa bin keda simannan largu pa skapa maltrato di su amigu. Gwèndoly ku Shairon ta tira kurpa abou den sala anochi, tin ora kompañá pa nan frei.

I Gibi? E ta drumi riba veranda atrobe. I tur anochi e ta pensa: ‘Porfin mi tin mi mes kas, pero mi problemanan a kana bini mi tras.’