Hende hai

Sin muchu gana, Rosheida a aseptá pa bai yuda Krisma na trabou djabièrnè mainta. Krisma ta su tanta. E ta traha hopi aña kaba den un kas di famia riba seru ku veranda na tres banda, ideal pa entretené amigu i konosí. Rosheida sa ku e trabou a bira hopi pisá pa su tanta. P’esei el a bolbe tuma aden pa yuda, maske el a hura ku pa nada di mundu e no ta pone pia den e kas ei mas.

E último biaha ku Rosheida a bai yuda, e señora di kas a organisá un almuerso informal pa su invitadonan. Miéntras Krisma i Rosheida ta pone kuminda den asèchi pa hiba mesa, e damanan ta chalalá, bati bleki, broma, kompará koló di uña i keha riba nan sirbienta. “Esaki ta kua?” un di e amiganan a puntra ora Rosheida a sali ku e promé plato. E señora di kas di: “Esaki ta Rosheida, bo no ta kòrd’é? Su prima a traha p’abo te poko tempu pasá.” “No bisami,” e amiga a kontestá. “Bo ke men e ta prima di Sharnella ku a hasi ko’i fresku ku mi kasá? Bo tin kurashi di lag’é traha p’abo ku dos yu hòmber den kas.” “Rosheida no ta traha p’ami,” e señora di kas a sigurá su amiga. Ora mi tin bishita so e ta bin yuda Krisma ku ta un tanta di dje.” “Ki bo di?” un di e otro damanan a dal aden. “Krisma ta traha ainda? Anto m’a kere ku el a habri fo’i otro dia bieu.”

Rosheida a sinti su kurason ta bati te den su orea. E no sa kiko ta trastorn’é mas, loke nan ta papia òf e hecho ku nan no tin kunes ku e ta tende. Nèt e ta bira pa bai paden, e señora di kas a pidié limpia kamber ku baño i laga Krisma sigui sirbi mesa. ‘Ménos mal,’ Rosheida a pensa. ‘Ya mi ta skapa di e hendenan akí’.

Den un rat’i ora el a kaba ku e baño pa bishita. El a spùit fragansia di bòter den aire pa e amiganan sinti nan mes den hotèl di 5 strea si nan mester bin laba man. Djei el a sigui pa kamber i baño di señora i mener. Manera den shòk Rosheida a keda pará den porta, miéntras e ta trata di splika su sintí kiko su wowonan ta mira. Banda di kama di mener, ku a kaba di rekuperá di un ferkout pisá, tabatin bintipiku lensu di papel ku kontenido abou na suela. Den baño, sèrbètè muá shorotá na bònder kant’i porta, ta warda riba sirbienta pa piki nan. Tur kaminda, asta riba tank’i awa di tualèt, tin kantidat di krema pa kurpa, bòter di shampu i kolonia, miéntras nan dòpi òf tapadera ta skeiru abou na suela.

Ya… ki ke hasi? Rosheida a bolbe primintí su tanta ku e ta bai yud’é. Pero e biaha akí e mes a kumpra hanskun pa trabou, pa piki ròmel for di abou na suela miéntras señora di kas i su amiganan ta hunga ròl di hende hai.