Kask’i pinda ta nòmber di un grupo kultural. Un di esnan ku mas talento na Kòrsou. Djabièrnè anochi nan tabata den Kachu, un programa na televishon di e outor i deklamadó Gibi Basilio. Komo parti di nan presentashon, Kask’i pinda a trese un número di Nanzi, den kua e figura di Cha Tiger tambe ta aparesé. Segun Kask’i pinda, Cha Tiger ta e mal elemento ku ta trese influenshanan di afó den nos kultura pa destruí loke ta outéntiko di Kòrsou.
Ta bon ku gruponan kultural ke elevá e apresio pa balornan di Kòrsou pa medio di baile, kanto i teater. Pero e mensahe ku nan a trese ta spanta hende pa dos motibu.
E promé motibu:
Si bo bisa ku Cha Tiger ta esun ku ta destruí loke ta outéntiko di Kòrsou, bo ta impliká ku Kompa Nanzi ta esun ku ta simbolisá balornan di Kòrsou. Pa tur esnan ku konosé e kuentanan di Nanzi, esei ta kos di spanta hende. Pasó den e kuentanan nos ta mira entre otro:
Nanzi ta skonde kuminda pa su mes kasá ku yunan. Miéntras su yunan ta yora di hamber, e ta kome e kuminda ketu-ketu.
Despues ku un wardadó di karné a salba Nanzi su bida, Nanzi a sera e hòmber den un saku ku soldánan di Shon Arei a pone kla pa bai tira na laman.
Nanzi ta traishoná i hòrta su amigunan, i asta ta hòrta prenda for di kurpa di defuntu.
Ora Nanzi su kasá traha tutu pa e bende, Nanzi ta kome tur e tutu na skondí.
E filosofia di bida di Nanzi i su bon amigu Braha Tukema ta: Pakiko lo mi traha si mi por haña tur kos pòrnada?
Ta esaki ta simbolisá balornan outéntiko di Kòrsou?
E di dos motibu:
E presentashon di Kask’i pinda a krea e impreshon ku tur loke ta di afó, ta kos di deskonfiá. I hende ku ta trese kos di afó, tambe ta di deskonfiá. Pakiko?
Tur hende ku ta promové balornan outéntiko di Kòrsou, tin paña na nan kurpa. Niun no ta kana rònt sunú. Si no ta e paña ta importá, ta e tela ta di afó.
Nan no ta trafiká riba buriku. Nan ta kore outo importá di afó, òf kue bùs importá di afó.
Kasi tur ingrediente di nan platonan krioyo ta importá di afó.
Nan ta biba den kas trahá di material importá di afó.
Nan ta skucha radio i mira televishon importá di afó.
Asina tin mil ehèmpel mas. Nada di esei no ta stroba nan di honra kultura i balornan di Kòrsou, ni di ántes, ni di awor. Pakiko ora otro hende hasi meskos, nan sí ta Cha Tiger?