Hende ku prehuisio ta biba masha relahá. Basta nan papia kos ku ta kai bon den nan sírkulo di amistat, nan no ta wòri ku bèrdat. Na Kòrsou tin mes tantu prehuisio ku tin infrou, i meskos ku infrou, prehuisio ta pika duru i e no ta laga lòs.
Un di e prehuisionan di aktualidat ta relashoná ku seramentu di Shell. Sin pensa mas aleu, un supuesto lider empresarial a deklará resientemente: “T’esei nos a gana. Awor Shell t’ei sera danki na nos sindikatonan”. E remarke akí ta mustra kuantu amargura tin skondí eibou. Pasobra un empresario grandi mestér ta di mala fé pa pretendé un kos asina.
No mas ku siman pasá, Financial Times a saka un artíkulo ku ta deskribí kuantu kompania multinashonal ta saliendo for di e área di Karibe pa motibunan struktural, merkado internashonal, i otro faktor ku ningun trahadó ni sindikato no tin influensia riba dje. Mas ainda, esnan ku gusta gaba kon barata suèldunan ta na Haïti i Santo Domingo, por lesa ku asta na e dos islanan ei, kompanianan multinashonal manera Alcoa i Reynold Metals a sera nan industria di bauxiet. Na Jamaica, kaminda e rabu di presidente Reagan, Edward Seaga, ta na mando, dos multinashonal a sera mina i refineria di bauxiet, i ún ta kla pa bula afó. Un multinational petrolero a sali for di Trinidat, i asta Hess Oil ku ta situá riba teritorio Merikano, a baha su kantidat di hende di 1000 pa 300. Finalmente, asta na Costa Rica, famoso komo paraíso di trankilidat den Sentro Amerika, un multinashonal Merikano a bandoná plantashonnan enorme di banana, pasobra e no ta bende sufisientemente mas riba merkado internashonal.
Lo ta muchu mas produktivo pa rekonosé e kousanan real di nos problemanan sin tira falta innesesariamente riba otro. Sikiera asina bo sa kiko ta e peligernan real ku bo tin ku enfrentá i bo por yuda otro pa enfrentá nan huntu. Pero … prehuisio ta mas fásil sí. Ta duele ku e no ta hiba nos niun kaminda.