Regalo
mi ke bishitá mi wela
mi tin dia sin mir’é
mi ke hiba un regalo
un kadena largu p’e
un bunita tur di mangel
tambe unu pa su man
pa mi zoya den su skochi
kome tur e mangelnan.
Bolo
mi tin sinku aña kaba
mucha grandi mes mi ta
mi sa traha bolo pretu
i di prùimu tur dòrná
un krenchi awa
un tiki tera
e ta kla un be
pone piedra
drei un poko
pero kòrda, no komé
Ami tambe
ami tambe
ami tambe
ami tambe ke
mi no sa mes
kiko tin
pero tòg mi ker’é
Skol
sinta nèchi
paga tinu
skol a kuminsá
saka pòtlot
kue papel
i pone tur kos kla
nos ta kuminsá mes ora
pa nos kaba tur trabou
si bo tin un kos di puntra
kòrda, ami ta yùfrou
awe nos ta siña kanta
riba ritmo un-dos-tres
nos ta pinta kas ku solo
anto traha sòm te dies
bèl a bati
skol a kaba
ayó pòpchinan
mi ta drecha boso tas
pa hunga skol mayan
Fruta
den e hòfi di mamoi
tin hopi tamarein
na tranké tin awakati
i un mandarein
tin apeldam
kashu sürnam
pampuna i papaya
mango, patia ku milon
i mespel band’i waya
tin koko, sòrsaka
ai, mi shon
no tin lugá di buta
ma esta duele ku mamoi
no ta gusta fruta
Araña
na mi kas tin un araña
pero mama no gust’é
e ta skonde tras di paña
pa mi mama no trap’é
esta tristu el a bira
ora el a sa porfin
ku mamai tin rel di mira
tur e patanan k’e tin
un pata akí
un pata aya
mi no sa di kon
ta manera tur ta bai
den otro direkshon
Linda
Linda tin un saya nobo
tur na kanchi ku payèt
ora Linda kana broma
e ta keda masha prèt
rikilin rikilai
ata Linda ta bai
ku su kurpa dòrná
tur na seda lombrá
rikilin rikilai
ata Linda ta bai
e ta yanga ku smak
pa nos tur keda wak.
Waf waf
nos kachó a haña yuchi
ocho na total
nan tin lana masha dushi
tur tin boka smal
waf waf waf
waf waf waf
promé nan no ta’ por
awor si nan tur ta blaf
nos tin henter un kor
Blòf
mi ta balia hulahup
mihó ku boso tur
den pele tambe mi ta bas
esei mi ta sigur
mi konosé mas wega bieu
den tur mi ta kampion
bleki-bleki, skonde dams
tur mi ta hunga bon
ma tòg mi no ta popular
ya lo b’a ripará
niun hende no gusta mi mas
mi tin kabes sushá
Amor di mucha
mira kuantu mi stima bo
di asina’ki te dak
mi stima bo mas ainda
te kaminda bo n’ por wak
mi stima bo te na shelu
te na kas di papa Dios
i tur dia mi ta resa
pa e kuida nos tur dos