Teater Literario

E konosido outor Kurasoleño Luis Daal (1919 – 1997) a yega di bisa ku Kòrsou no ta duna sufisiente balor na dokumentashon. Loke dokumentá bon awe, por sirbi komo fuente di informashon históriko mañan. Pensando riba e palabranan ei, Lucille Berry-Haseth, outor i promotor inkansabel di literatura na Papiamentu, a konsehá mi pa buska i rekuperá dos guión ku mi a yega di skirbi pa teater, i ku ta kontené hopi dato históriko di literatura Papiamentu. E promé, Konmemorashon di 100 aña di poesia literario na Papiamentu, tabata dia 26 di septèmber 2005 den ouditorio di WTC. E tabata organisá pa Nydia Ecury, Gibi Bacilio, Roland Colastica, i Lucille Haseth, ku koperashon di Fundashon pa Planifikashon di Idioma. E di dos, Un poema bida ta, tabata na September 2006 na Teater Luna Blou, i tabata organisá pa Fundashon Pierre Lauffer. Mi tabatin e plaser i honor di skirbi e guión pa tur dos programa i presentá ambos nochi literario komo maestro di seremonia.