Traha bou di menasa di retiro, ta un kos teribel. Hende ku tabata traha na Shell por ehèmpel, a biba pa años den tenshon. Kisas asta nan a envidiá personal di ALM i Dok. Pasobra maske kon malu e kompanianan ei tabata drei, nan sí no a kita hende. Ta kompania di gobièrnu nan ta. I gobièrnu(nan) a disidí pa tene tur hende na trabou pa motibunan sosial, i laga e kompanianan sigui pèrdè sèn. Ta duele ku finalmente ta pueblo a hiba vra. I e trahadónan ku a kere ku nan trabou ta sigurá, a bin sinti e konsekuensia tòg.
Na 1978 ALM a kuminsá sufri pérdida pa motibu di faktornan eksterno í faktornan politiko interno. Faktornan eksterno ta p.e. subida di preis di kombustibel, i e hecho ku American Airlines i despues Eastern Airlines a kuminsá kompetí riba ALM su ruta lukrativo pa Miami. Faktornan polítiko interno tabata p.e. ku gobièrnu no tabata laga ALM hiba un maneho komersial. Riba tereno di tarifa, buelo, i kantidat di personal, ALM mester a hasi loke ta kumbiní gobièrnu su popularidat.
Entre otro p’esei ALM a sufri pérdida di 82.3 mion florin entre 1978 i awor. Na novèmber 1980, gerensia di ALM a pidi pa e baha 110 empleado komo ALM su produkshon a baha ku 30%. Gobièrnu a yama un ehérsito di eksperto pa bini ku otro medida pa no mester kita personal. Pero nan tur (èks miémbro di Dok Van Waasdijk, Kontrolaria General, United Nations Development program, i e konseheronan Merikano Simat, Hellisen & Eichner) a konkluí ku e kompania tin mas hende na trabou ku e por paga.
Awe, 8 aña despues, Promé minister Don Martina a anunsiá ku e próksimo 4 añanan akí, ALM lo bolbe sufri un pérdida di 50 mion florin. I su gabinete a atmití ku komunidat no por sigui supsidiá ALM komo un ‘sociale werkplaats’ luhoso. I komo e situashon a bira mas i mas pió, awor mester kita 400 hende fo’i trabou en bes di e 110 ku a rekomendá na 1980. Ku otro palabra: Gobièrnu no kièr a tuma desishon … ata awor desishon a tuma gobièrnu. Anto kon!
No ta 100% sigur ku lo por a salba e kompania si a kita 110 empleado for di 1980. Pero a resultá sigur ku si nos mes no tuma desishon na tempu, finalmente e desishon ta tuma nos na brutu. Tambe ta sigur ku e kustumber ‘sosial’ di supsidiá kompania di gobièrnu añanan largu, semper ta sali pueblo malu. Mas asosial no por.