E lugá ku karnaval a konkistá den kurason di pueblo, ta un bon ehèmpel ku ora un kos ta dushi, nos ta bras’é, hasié di nos, i koron’é ku e stèmpel di Kultura, asta si el a bini di Europa. Karnaval ta un bon ehèmpel.
Presis presis presis, niun hende lo no por bisa unda karnaval a originá. Pero mayoria fuente ta mustra riba paisnan den e parti sur di Europa, i ku mas presishon riba Italia. Nan ta bisa ku e palabra karnaval ta dedusí di “Carne vale” ku na Latin ke men “ayó karni”. Pasobra – maske hopi hende no ta kòrda esei mas – e idea di karnaval ta pa fiesta promé ku e 40 dianan di kuaresma, ku ta kai entre diárason di shinishi i Pasku di resurekshon. Komo fiesta katóliko el a plama den otro pais katóliko den e parti sur di Europeo, manera Spaña, Portugal i en parte Fransha tambe. E paisnan aki a trese karnaval den Latino Amerika i Karibe, den tempu ku nan a kolonisá paisnan den e area akí. Te ei e influensha europeo ta yega.
Pero… una bes den e region akí, karnaval a haña un inyekshon kultural di orígen afrikano. Meskos ku na Europa, pueblonan na Afrika tambe tabatatin proseshonnan disfrasá. No relashoná ku kuaresma, pasobra e pueblonan no tabata katóliko. Pero nan tabatin proseshon pa otro motibu, por ehèmpel pa selebrá kosecha, pa atraé suèrtè, pa kore ku spiritu òf honra antepasadonan. Den karnaval den Karibe, no ta muzik ku baile so tin elemento afrikano. Pero e simbolismo tambe.
Na Europa, originalmente, hende tabata disfrasá den karnaval pa nan por gosa, parandiá, sin ku otro hende ta rekonosé nan. E disfras tabata pa pasa prèt, i alabes pa skonde su tras. En kambio den e tradishon afrikano, e disfras ta representá un idea òf ekspresá algu partikular. Uso di pluma por ehèmpel, na Afrika ta símbolo di hende su abilidat pa surpasá problema i surpasá doló. I awe, bo no por imaginábo ún gran marcha sin diferente grupo ku pluma den disfras. Kisas hende no sa mas kiko e plumanan ta nifiká, pero ta klaritu sí di unda e kustumber a originá. I natural tin vários grupo tambe ku disfrasnan ku no ta bisa nada otro sino gosa, divertí i pasa prèt.
En korto, karnaval ta un di e resultadonan mas duradero di e enkuentro kultural ku – pa bon òf pa malu – a start siglonan pasá den e parti akí di mundu.